miércoles, 7 de febrero de 2024

Viva Rosalía!


Febreiro é o mes de Rosalía de Castro, xa que nel se celebra o aniversario do nacemento da nosa escritora máis universal. Por iso, para conmemorar os 187 anos que cumpriría o día 23 a autora de Cantares galegos, animámosvos a que vos acheguedes aos seus versos a través dalgunhas das obras que están dispoñibles na biblio, tanto en formato papel como tamén en CD, cos seus poemas musicados.

Premendo aquí podedes consultar o catálogo da biblioteca para irdes escollendo as propostas que máis vos interesen.

Ademais, recordade que, con motivo das celebracións deste ano arredor da autora, as compras de libro en galego que se realicen ata o 3 de marzo nos negocios adscritos á Federación de Librarías de Galicia teñen como agasallo unha escolma da obra da autora, grazas a unha iniciativa promovida polas fundacións Rosalía de Castro e Xistral. 

Vivan Rosalía e a literatura galega!



viernes, 2 de febrero de 2024

De recitar na biblio a representar o IES de Foz na Casa-Museo Manuel María

Carmela, de 1º da ESO, e Pablo, de 2º da ESO, serán os representantes do IES de Foz na nova edición do certame de recitado poético Rosalía sempre Viva, que se celebrará o vindeiro 2 de marzo na Casa-Museo Manuel María, no concello lucense de Outeiro de Rei. 

Os versos dos dous poetas soaron nas voces de Pablo e Carmela nun emotivo recital que tivo lugar na biblioteca e que lles deu a ambos o pasaporte para a fase final do concurso.

O Equipo de Dinamización da Lingua Galega do IES de Foz vén organizando a selección do alumnado do centro para participar nun certame que busca promover a expresión oral e a creatividade entre o alumnado non universitario a través dos versos de Rosalía e de Manuel María.

Moita sorte para Carmela e Pablo na final!

miércoles, 17 de enero de 2024

Os textos gañadores do Certame de Microrrelatos afondan no medo, na empatía e nos sentimentos dun adolescente inmigrante

Os alumnos Carmen Ballesteros Colino, Fernando A. León Cosme e Iago Balseiro Parga son os novos gañadores do Certame de Microrrelatos do IES de Foz. Os seus textos sobre as emocións resultaron galardoados nas dúas categorías do certame. Así, Fernando A. Léon Cosme, de 3º de ESO A, fíxose co primeiro premio do segundo ciclo de secundaria, bacharelato e FPB coa súa obra Relatos dun adolescente inmigrante, mentres que Carmen Ballesteros Colino, de 1º de ESO B, acadou o primeiro premio do primeiro ciclo da ESO co texto titulado ¿A qué le tienes miedo? Ademais, o xurado do certame, formado polo alumnado colaborador da biblioteca, tamén lle concedeu o segundo premio desta categoría a Iago Balseiro Parga, de 1º de ESO A, pola obra Empatía

Os gañadores recibirán cadanseu premio o xoves 18 de xaneiro na biblioteca, ás 11:45 horas. Moitos parabéns aos premiados e grazas a todas as persoas que participaron nesta iniciativa, que busca promover a escrita creativa entre a mocidade.

jueves, 11 de enero de 2024

Marchando unha de novidades!

Desde a Biblioteca, queremos que comeces o ano da mellor maneira, por iso as nosas colaboradoras e colaboradores prepararon unha selección de novidades repleta de propostas saborosas para todos os padais. Neste menú, non faltan os manuais de xadrez, que de seguro farán as delicias do alumnado que participa no próximo campionato deste xogo, así como propostas para os máis curiosos e curiosas que fusionan ciencia e cociña, como La física de las palomitas.
Outras das obras seleccionadas propoñen unha viaxe ao pasado, tanto á Grecia clásica, da man dos mitos e lendas de Anisia Miranda, como ás orixes da especie humana, a través do documental La odisea de la especie. As viaxes tamén están moi presentes no último número do xornal da xente miúda O Papagaio, que achega os máis novos á obra A volta ao mundo en 80 días, de Jules Verne, ademais de a persoeiros destacados da historia, como o arquitecto Antoni Gaudí ou o físico Isaac Newton. Outras figuras clave, neste caso do ámbito das letras, son as protagonistas da banda deseñada Cuatro poetas en guerra, que xira arredor dos autores Antonio Machado, Federico García Lorca, Manuel Hernández e Juan Ramón Jiménez. E tamén a través do cómic nos chegan as entretidas aventuras de series de anime como Dragon Ball ou Denon Slayer, que son outras das apetitosas propostas que te agardan na biblioteca para comezar o ano da mellor maneira: lendo!

sábado, 23 de diciembre de 2023

Felices lecturas!

Este Nadal, tes unha chea de propostas para gozar da lectura no tempo teu tempo de lecer. Bótalles unha ollada ás recomendacións que suxire o profesorado do IES de Foz e escolle a obra que máis che interese. Nestas recomendacións non faltan historias de medo e misterio, viaxes a través das xeografías máis singulares do planeta, biografías das nosas pioneiras galegas ou o universo de Harry Potter; unha variada selección na que, de seguro, atoparás lecturas do teu interese. Consulta esta edición especial de Nadal preparada pola docente Lucía Teijeiro e escolle a túa aventura para rematar o ano da mellor maneira. Que teñas unha feliz lectura!

miércoles, 13 de diciembre de 2023

Bule, que remata...!

Últimos días para inscribirse no Campionato de Xadrez que organiza a Biblioteca. Se desfrutas con este xogo e che apetece pasar un rato entretido, a que esperas? Tes ata o 15 de decembro para anotarte na lista que está dispoñible no taboleiro da biblioteca. Así que, corre e prepárate para gozar das partidas que se celebrarán nos recreos dos mércores. Ademais, haberá premios para as tres primeiras persoas clasificadas.

jueves, 16 de noviembre de 2023

Novembro, mes da lectura

Calquera mes é ideal para nos mergullar nun libro, pero novembro é o escollido para conmemorar o Día da Lectura en Galicia. O motivo: o nacemento do escritor galego Xosé Neira Vilas, autor de obras tan senlleiras como Memorias dun neno labrego. Este e outros títulos do autor están dispoñibles na biblioteca. Anímaste a navegar a través dalgunha das súas historias?!